بعد اول يوم فى الجامعة .. حسيت انى زهقانة جدا ..
و كمان نزلت لقيت الدنيا واقفة و مافيش اى حاجة توادنى البيت
قررت اتمشى زى زمان .. يلا اهو سور جنينة الحيوانات و بعدين كوبرى الجامعة القريب من قلبى
و على الكوبرى كلمت ايما و هيثم و مالقيتش اى حد فاضيلى
المهم عند القصر العينى
تاكسى : سيدة عائشة
واحد اخيرا قالى اتفضلى
افف نسيت معييش فكة كفاية : لو سمحت معاك فكة 100
الرجل قالى تصدقى و تأمنى بايه
لا الله الا اله
ماهو لو كان معايا 100 جنيه مكنتش و نزلت و سايب مراتى بتولد
الدكتور عايز 150 جنيه عشان تولد قيصرى
و لما قلت له اجيبلك الفلوس بعد ما تولد قاللى هو انا جزار هتشكك معايا
طبعا قلت له كل الكلمات اللى هى ربنا كريم و ربنا معاك و ان شاء الله
و طبعا قرر يحكيلى حكايته
انه اصلا سواق سياحة و انه من 24 شهر عمل حادثة و اتقلب بالعربية و عمل عمليات ايه و ركب سنان ايه و ظهره معرفش ماله
و انه اول مرة ينزل النهاردة عشان يجيب حق الولادة
"اصل انا يا انسة عملت الحادثة اصلا بسبب مراتى"
اتخنقت معاه و كانت عايزه تتطلق عشان ربنا ماداهومش عيال
و هما بيحبو بعض جدا
و متجوزيين عن حب
و لما قالت له كده اتجنن
و عمل الحادثة
المهم و هو تعبان بقه
الست حملت من 7 شهور
و هتولد قيصرى
و لازم يروحلاها معاه الفلوس
طبعا قعدت افكر
يا امنية تيديلو اللى معاكى و خلاص
اففف بس اكيد امى هتتريق عليا و تقولى انى عبيطة
و ابص فى المراية على وشه
استجدى ملامح الغلب او الصدق فى وشه
و بعد التمتمة بكل الادعية اللى ممكن اقولها
قلت له "طلعنى المقطم من فضلك"و
بعدها التزمت الصمت و هو كمان فضل سرحان فى اللى هو فيه
و قعدت افكر طول السكه هو ايه اللى ممكن اعمله ... يا دينى على دا يوم
